Jæja, þá er það orðið ljóst... Íslendingar næst bestir í handbolta. Stóðu sig vel á leikunum þó að leikurinn í morgun hafi ekki verið sá besti. Frábært að "strákarnir okkar" komi heim með silfur.

Ég lagði mig aðeins eftir leikinn, með hausinn fullan af kvefi og ekki alveg í bestu stemmningunni. Eiginlega hálf fegin að það sé rigning... því ég er alveg í rigningarstuði. Væri til í að liggja undir teppi í allan dag og lesa eða glápa á eitthvað heimskulegt. Aldrei að vita nema ég láti það eftir mér seinna í dag. Þarf að ná mér hressari fyrir vikuna svo ég verði í stuði að taka á móti nemendunum og kynnast þeim. Er já sem sagt byrjuð í nýju vinnunni og líst vel á. Er spennt að sjá hvernig veturinn verður.

Læt þetta duga í bili. Ætla að snýta mér og fá mér eitthvað að borða.

Til hamingju Ísland!

Dóra - kvefuð í rigningunni

Ertu að kidda mig?!?! Fjörtíuogfimm mínútna þýsk heimildarmynd um suðræn fiðrildi í sjónvarpinu í kvöld! Eru ólympíuleikar sjónvarpsstöðva í gangi þessa dagana, þar sem keppt er um hver getur boðið upp á lélegustu dagskrána? Maður bara spyr sig. Ekki það að það gæti alveg verið gaman að sjá heimildarmynd um fiðrildi... en þrjú korter???
Og svo ekkert nema lélegir "raunveruleikaþættir" um líf og störf útbrunninna selebretís á skjánum. Jú... og Eureka!!!

Úff... veit ekki hvort er verra... sjónvarpsdagskráin eða það að ég skuli blogga um sjónvarpsdagskrána... sorry.

Dóra

Úff... vika liðin af ágúst! Bara vika í að ég byrji í nýju vinnunni og sumarfríinu ljúki. Verst að ég er ekki alveg búin að koma mér fyrir í nýju íbúðinni... en þetta er allt að koma. Bara smá eftir sem ég vil ljúka áður en ég byrja að vinna... svo kemur hitt bara smátt og smátt. Vonandi verður orðið þokkalegt hjá mér fyrir jól

Ég er aðeins búin að vera að skoða það sem ég á að kenna í vetur, kíkja í aðalnámskrá og á námsgagnastofnun. Fann þar skemmtilegan vef... þ.e. fyrir þá sem hafa áhuga á myndlist (www.nams.is/listavefurinn/index.html) en svo er spurning hvort ég get eitthvað nýtt hann í kennslunni. Veit ekki alveg hvernig tölvurnar eru í skólanum og svo er ekki víst að ég hafi aðgang að tölvum þegar ég er með myndmenntatíma... en það verður að koma í ljós bara. Ég get amk. lært eitthvað sjálf af vefnum. Spennó að kenna myndmennt!

Annars lítið að frétta annað en að Sunna kemur á morgun... jei!

Gott í bili.

Dóra - myndmenntakennari!

Jæja, þá er ég flutt... reyndar fyrir viku síðan... og búin að fá netið tengt   Ég er ennþá að koma mér fyrir, á eftir að festa upp nokkrar hillur, finna mér ljós í stofuna, mála þvottahúsið (er langt komin með það samt) og þá fer þetta allt að verða komið   Frábært!

Ég er í sumarfríi... eða atvinnulaus eins og við Heiða köllum það Er sem sagt hætt á Skógarborg... (í síðasta skipti???) og byrja ekki að kenna fyrr en um miðjan ágúst. Fríið ætla ég að nota til að klára að koma mér fyrir og undirbúa mig fyrir nýju vinnuna... þarf m.a. að kenna á forrit sem ég hef aldrei séð... hvað þá að ég kunni á það En það hlýtur að fara einhvern veginn. Ætla jafnvel að gera eitthvað sumarfríslegt í fríinu líka! Er að spá í að skella mér í bústaðinn um verslunarmannahelgina. Vona bara að veðrið verði gott... eins og allir aðrir landsmenn!
Svo er Sunna að koma til landsins í ágúst Hlakka ekkert smá til!

Gott í bili.

Dóra - alveg að fara úr málningagallanum!

Smá up-date

Staðan er þannig að við erum langt komin með að mála, stefnt á að klára það á morgun. Jósi er búinn að græja megnið af rafmagninu og setja upp ljós. Þá er eftir eitt og annað sem þeir pabbi ætla að ganga í fyrir mig (því ég kann ekki til verka!) og ætlunin er að flytja síðar í vikunni eða í síðasta lagi um helgina!

Heiða - það eru bara 4 vinnudagar eftir!

Gott í bili

Dóra - með málningu í hárinu!

Já sæll. Kominn júlí! Loksins... nú fer að styttast í fríið. Bara 16 dagar eftir (Heiða... bara 16!).

Annars er það að frétta að ég skrifaði undir kaupsamning áðan. Er sem sagt um það bil að verða alvöru homeowner Loksins!

Fæ íbúðina afhenta eftir rúma viku og get varla beðið. Ýmis plön í gangi og ég er búin að fara nokkrar ferðir í IKEA. Fleiri ferðir þangað eru fyrirhugaðar síðar, er aðeins að reyna að hemja mig í kaupunum svona þangað til ég er komin með lyklana.

Gott í bili.

Já já, orðin þrítug og líður bara vel með það :þ

Til lukku með daginn Helga

Mér sem sagt tókst að klára skólann á miðvikudaginn og fór beinustu leið austur í bústað. Lá þar í leti alla helgina, lét mig reyndar hafa það að fara á dýrindis tónleika með Þröstunum í Skálholti á fimmtudaginn... og sá ekkert eftir því. Annars lá ég bara með allar tær upp í loft og át og drakk kaffi annað hvort í Hosiló eða Ásakoti.

Ég byrjaði svo að vinna á Skógarborg í gær. Var gjörsamlega búin eftir daginn! Það tók heldur betur á að þurfa að klæða sig (geta ekki verið á heimafötunum fram eftir degi), standa í lappirnar meira eða minna allan daginn og hreyfa fleiri líkamsparta en augu og fingur. Varð að leggja mig í klukkutíma eftir vinnuna til þess að hafa það af í saumó um kvöldið! Hefði þótt slæmt að missa af saumó þar sem Sigga Kolla var mætt alla leiðina frá Ítalíu.

Eftir vinnu í dag fór ég í afmælispartý til Helgu, gúffaði í mig allskonar gúmmelaði og át á mig gat eins og vill gerast í svona veislum.

Á morgun er ekkert planað eftir vinnu. Það verður bara frí og ég er að hugsa um að horfa á sjónvarpið bara! Því á fimmtudaginn er planið að fara út að borða, partý á föstudaginn, kannski fara í sumarbústaðinn á laugardaginn og líklega kaffi til Siggu Kollu á sunnudaginn. Þannig að mér ætti ekkert að leiðast þó ég þurfi ekki að sitja við tölvuna öll kvöld.

Gott í bili.
Dóra - búin með skólann!

Gleðilegt sumar!

Ég er sem sagt enn á lífi... er bara á fullu að læra og reyna að klára allt á tilsettum tíma. Eða reyndar helst aðeins fyrr svo ég komist á tónleika hjá Jósa mági mínum 1. maí í Skálholti... og fái þá langa helgi í bústaðnum áður en ég fer að vinna mánudaginn 5. maí.

Þetta er alveg að verða búið!

Dóra - í sólskinsskapi

Vó! Tíminn flýgur! Bara 3 og hálf vika eftir af skólanum... og allt að verða vitlaust. Fannst heldur undarlegt í gær þegar einn kennarinn sagði við okkur:

"Hvernig líður ykkur? Nú er kominn sá tími þegar nemendur í þessu námi bresta gjarnan í grát og eru útaugaðir af stressi!".... uuu... af hverju er námið þá ekki skipulagt betur og fólki hlíft við þessu stressi?!? Þetta er kannski einhversskonar eldskírn fyrir kennarastarfið?!?

Ég var annars að koma heim úr viku útlegð. Flutti bara upp í skóla, er hvort eð er svo mikið þar í allskonar hópavinnu og veseni að það var alveg jafn gott að fara bara með sængina og koddan þangað og leggja sig á sófunum í Odda... Nei... Grín! Var hjá Helgu. Jósi var í útlöndum og ég fór að halda henni félagsskap. Ægilega góður félagsskapur. Fór út fyrir 8 á morgnana og kom heim seint og síðar meir, hékk svo í tölvunni að skipuleggja allskonar hópavinnur og hitting.

Bráðum hætti ég að tuða yfir skólanum... bara rúmar 3 vikur eftir... og þá tekur leikskólavinnan við

Dóra - tuðari

Þá er páskafríið komið og farið. Ég skellti mér upp í bústað á föstudagskvöldið og lá í leti þar til í gær. Dásemdar frí! Frábært að taka sér svona pásu frá skólanum. En nú er sælan búin og skólinn tekinn við. Verkefnaskil á verkefnaskil ofan næstu vikurnar... en svo er þetta bara að verða búið!

Ég er í pásu frá verkefnavinnu núna (ca. næstu 5 mínúturnar) og ákvað að setja páskamyndirnar inn á tölvuna. Rakst þá á þessa mynd sem ég tók að ganni mínu um daginn. Svona í tilefni af því að einu sinni fannst mér ógeðslega kúl tilhugsun að sitja fyrir framan tölvuna með bókastaflana allt í kring um mig, helst með gleraugun á nefinu, og vera í háskólanámi.... þetta var sem sagt áður en ég byrjaði í mannfræðinni. Mér finnst þetta ekki svo kúl lengur!

Dóra - að læra

Ég bakaði eplaköku með kaffinu í dag.  Hún er búin... enda mjög góð!

Ætla að skella uppskriftinni hér inn. Fékk hana reyndar af netinu... en ég get nú aldrei farið alveg eftir uppskriftum þannig að ég breytti henni smá og set því mína útgáfu hér.

1 bolli hveiti 2/3 bolli sykur 150 g smjör 1 tsk lyftiduft 2 egg 1/2 -1 tsk vanillusykur 2 stór epli kanelsykur

Bræðið smjörið og hrærið svo hveiti, sykri, lyftidufti og vanillusykri saman við. Setjið eggin út í eitt í einu. Setjið degið í eldafast mót. Skrælið eplin og skerið í báta (frekar þunna) og raðið þeim ofan á degið. Stráið að lokum kanelsykri yfir (magn fer eftir smekk, en ég mæli með að það sé meiri en minni kanell í sykrinum). Bakið við 200° í ca. 20 mín. Örugglega rosagott með rjóma eða ís ef sá gállinn er á manni.
Nammi namm!

Og svo er ég að fara út að borða í kvöld... haldiði að það sé!

Dóra - bakari

Já já, löngu kominn mars og Vorið farið að stríða manni. Það rekur fram nefið þriðjahvern dag með sólskini og fíneríi og vekur upp í manni vorfílinginn, en liggur svo í felum hina dagana á meðan Vetur konungur geysist um og hristir úr sér snjóinn til að minna á að hann er sko enn við völd!

Í dag er Vorið að glenna sig. Best að muna eftir sólgleraugunum í dag!

Ég sáði fyrir tómötum, basilíku og kóriander um helgina. Svo sit ég og stari á moldina og bíð eftir að það fari eitthvað að koma upp En það tekur nú víst einhverja daga eða vikur. Mamma er búin að sá fyrir einhverjum blómum sem eru aðeins að komast á legg, búið að koma þeim í smápotta þar sem þau fá að vaxa þar til frost verður farið úr jörðu í Hosiló. Verst að það gerist ekki fyrr en seint og síðarmeir. En við njótum þess þá bara að horfa á blómin hérna heima þangað til.

Dóra - í vorfíling... í dag amk.

Verður maður ekki að blogga á þessum merkis degi? Alveg fjögur ár þar til það verður hægt næst. Reyndar finnst mér hlaupársdagurinn vera algjörlega vanhugsaður... að minnsta kosti frá íslenskum sjónarhóli séð. Hann ætti að sjálfsögðu að vera í júlí en ekki febrúar... við höfum alveg nógu marga vetrardaga í venjulegu ári! Þar að auki finnst mér að það ætti að vera alþjóðlegt frí á hlaupársdag. Dagurinn er varla til!

Nóg um það... þar til að fjórum árum liðnum

Ég kláraði æfingakennsluna í dag Ægilega glöð og ánægð með sjálfa mig. Kennslan heppnaðist vel og ég er fegin að þetta er búið. Nú eru ekki nema 10 verkefni sem bíða eftir að vera unnin... og svo er skólinn bara búinn eftir tvo mánuði!!!

Annað var það ekki á þessum ágæta hlaupársdegi.

Dóra - fegin að eiga ekki afmæli í dag!

Það er ótrúlega gott að vera að fara að kenna eitthvað sem maður hefur ekkert vit á og hefur ekki hugmynd um hvað maður á að segja um við nemendur! Púff.... held að hausinn á mér springi bráðum af því gríðarlega magni af nýjum upplýsingum um sjónvarp og kvikmyndir sem ég hef verið að troða inn í hann síðustu sólarhringa. Ekki svo að skilja að þetta sé leiðinlegt! Langt í frá. Allt mjög fróðlegt og skemmtilegt... þetta er bara svo mikið. Og að þurfa ekki bara að læra efnið sjálf... heldur líka skipuleggja hvernig ég ætla að koma því áfram til nemendanna á skemmilegan hátt þannig að eitthvað sitji eftir í hausnum á þeim. Það var einhvern veginn auðveldara að kenna enska málfræði bara... en reyndar ekki svona skemmtilegt

Afleysingin gekk vel. Ég hitti á playtakkann og allt. Kenndi meira að segja pínulítið á powerpoint... útgáfu sem ég hef aldrei notað áður... en það gekk allt.

Ein spurning í lokin: Hvaða ár var Eurovision fyrst sýnd í íslensku sjónvarpi?

Dóra - með sjónvarp og bíó á heilanum!